ايش اجمل شي صار لكم اليوم ؟

February 08, 2014

يصير أمس؟
أول مرة أحضر الملتقى كفتاة منظمة من النادي
وسويت ورشة عمل مع أختي قدام اكثر من ١٥٠ شخص ونجحت الحمد لله ؛) ❤️

Liked by: Erum Ali

بيان أول شيء أنتِ إنسانه لطيفه جدًا جدًا ثاني شيء الحين أنا مستوى ثالث يمديني أرفع معدلي تتوقعين؟ لأن صديقاتي يقولون الأول والثاني تقدرين ومن بعدهم صعب مرره! وان ارتفع اللي بعد الفاصله برقم أو رقمين بس :(

February 05, 2014

أول شي شكرًا كثيرًا كثيرًا
ماعندي كلش فكرة بالضبط لأن يعتمد على تخصصك، وانا بعد توي مستوى رابع، بس اختي -سنة سادسة- تقول اول سنتين -٤مستويات- يمديك ترفعين المعدل اسهل من الباقي عادة.
ممكن ما افدتك واجد، بس ابتعدي عن المثبطين؛) والا تقدرين ترفعينه اذا اصريتي على الايه على الاقل في المواد الثقيلة -ان شاء الله- ؛) موفقة

Liked by: Erum Ali

برأيك ليش شخصياتنا في تويتر تختلف عن شخصياتنا الحقيقية؟

February 03, 2014

أعزي الموضوع لثلاث أمور:
١/ النفاق الإجتماعي الألكتروني والنرجسية . فيكون الشخص الملاك الرحيم إلكترونيًا والوحش الكاسر على أرض الواقع. الكل يحب أن يظهر بمظهر الشخص اللامع المثقف المتوازن يتغنى بأعذب الكلام ويتفنن بالصور ليحبه الآخرون، يثنون عليه فيعزز الأنا فيه. المثالية صارت هاجس هذي الايام في الانترنت. والنرجسية منتشرة جدًا.

٢/ الرغبة في أن يكون الشخص ضمن جماعة. الكل صار متطوع، فاعل خير، قارئ ومعتدل دينيًا. صاروا الناس يشبهون بعض في الانترنت لهم نفس الذوق الفني، يصممون نفس الافكار ، يصورون بنفس التكوينات والألوان، يكتبون عن ذات الأشياء.
ليش ؟ لأن هذي موضة الانترنت. الواحد ممكن يتبعها بدون ماتكون تعبر عنه، لأن مو سهل أن تكون مختلف.

٣/ الشخصية الحقيقية الخفية: يكون الشخص يستطيع أن يظهر بحقيقته في الانترنت. ما اسميه نفاق أو كذب لأن هذا بالضبط زي مايكون الواحد طبيعته في البيت غير بره. يمكن عشان الانترنت يكون واسطة بينه وبين الناس فمايحس أنه مقابل لهم بشكل مباشر، ممكن لأسباب أخرى يكون يقدر يعبر عن نفسه أكثر في الانترنت.

Liked by: Zahra Almutawa Fatima

كيف نرفع مستوانا في الاختبارات علشان نضمن التخصص علمًا اني مسار صحي..

February 03, 2014

الإختبارات بأسلوب الخيارات المتعددة اسلوب ذكي.
يعتمد على فهم المعلومة بالمركز الاول، وكيف تحللينها.
لازم تربطين الاشياء ببعض، وتفهمين ليش صارت بالضبط-حتى لو ضيع شوي وقت- لا تعتمدين على الحفظ بس
.
لو ماعرفتي الجواب تحاولين تستخدمين اسلوب معاكس، تحللين الاجابات وتشوفين ايش مستحيل يكون جواب، باستبعادهم شوي شوي تحصلين الجواب- هالطريقة انقذتني واجد-

اكبر غلط تأخير المذاكرة الى ماتوصلين اما مرحلة- تروحين مواصلة- أو مرحلة الفزع اللي تخافين ماتخلصين مذاكرة
حتى لو حسيتي الوقت طويل قبل الاختبار، حاولي على الاقل تختمين المادة قبل بيوم من الاختبار واليوم الاخير تثبيت معلومات ومراجعة - جدًا جدًا جدًا جدًا جدًا مفيدة بالنسبة لي- "ولا بأس ببعض الاستثنائات لو مادة ماقدرتي مافي مشكلة-

خلي عندك مصدرك للمذاكرة واضح ، لا تشتتين نفسك بسلايدات فلان ولا فلان ولا فلان. خلي عندك مصادر واضحة "سلايدات فلانه والكتاب مثلا" وركزي فيهم.

ابتعدي عن المثبطين، واذا القروبات تتأزم واجد وقت الاختبارات لا تدخلينها -لو صديقاتك يتأزمون بطريقة مزعجة عادي لا تسمعين لهم ذيك الفترة- مو ماتكلمينهم ههههه بس الصباح والليل عرفي مع مين تسالفين وما بيحطمك.

الراحة النفسية، بالدعاء والقرآن والثقة بالله اولًا وبقدراتج ثانيًا. هذي أوول شي في كل شي
موفقة.

Liked by: Erum Ali

بيان عندي مشكلة في تنظيم الوقت وهذا الشي أثر على مستوايي ، كيف كنتي تنظمي وقتش؟

February 03, 2014

أكثر شي كنت أسويه وكان فعال
تحديد مهمات اليوم مع الوقت: جربي تكتبين اول اليوم أو في نهاية الدوام ، ايش لازم تسوين بالضبط؟ ايش اشياء ضرورية واشياء تنتظر ؟
ممكن تكونين مرنه بدون اوقات، أو تحددين لك وقت لكل مهمة.
حاولي قد ماتقدرين ماتنامين العصر، ادري هالشي لازم عند أغلب الناس، لكنه يضيع الوقت ويكسر الجسم -لأننا ماننام قيلولة ننام غيبوبة- والاهم لأنه ادمان متى ماتعودتي عليه تحسين صعب ماتنامين " ممكن بعض الاستثنائات في بعض الايام"

بس اهم شي قائمة المهام وتقسيمها لأوقات- اسوي هالطريقة وانا اذاكر بعد ، هالتشابترين اخلصهم ٤ ، بعدها بريك نص ساعة وهكذا"

موفقة

مع او ضد مقولة ( فاقد الشيء لا يعطيه ) ، مع توضيح مثال ان امكن ! < حسسيت اني اكتب اسئله اختبار هههههههههههههههههههههههههههههههه يلا مششوها

Erum Ali

February 03, 2014

مع وضد
من جانب نفسي ، الشخص اللي مايحب نفسه أولًا مابيحب الناس . واللي مايدعم نفسه بنفسه مابيدعم الناس وهلم جرًا؛)

من جانب مادي-نفسي، أحيانًا الشخص يكون معدم وتكون حياته كئيبة، لكنه مع الناس أفضل داعم. أقدر أضرب مثال بالأم اللي تعطي عيالها من عمرها وتوفر لهم فرص هي نفسها ماعندها اياها.

Liked by: βΣπẓ وديعة وَلاء الفرج .. Erum Ali

يالظالمه!! اجل الطب مايختبرون كثركم ؟ واختبار كل سبت طول السنه الرسمي غير المتفرقات وين راح؟ الله يسامحچ بس

January 27, 2014

قارنت مع بنات الطب سنة ثانية هالسنة
مابدأ النظام حق كل احد الى آخر شهرين من السمستر
احنا من ثالث اسبوع نبدأ ؛)

الله يسامحني :)
ٓ

Liked by: Balsam Ali Erum Ali

هل هناك شخصية معيّنة، من كتاب أو فلم، تحسين إنك معجبة بها؟

January 26, 2014

كثير يعجبوني شخصيات لكن اول من خطر ببالي
شخصية نور من كتاب ألواح ودسر
وحاليًا لم أزل واقعة في حب شخصية شيرلوك من المسلسل.

Liked by: خــولــة.

كيف يذاكرو احياء

January 16, 2014

تكتبين مع الدكتورة
تاقرين المحاضرة اللي فاتت قبل المحاضرة الجديدة
-لو تقدرين تحصلين وقت و تذاكرينها أحسن وأحسن-
وقت الإختبار : تذاكرين النوتز كويس جدًا + تروحين للكتاب وتذاكرين الجزئيات اللي معاكم منها جدًا مهم

طيب لو وحدة من المواد بس B , المعدل ينزل عن 4.5 ?

January 16, 2014

ما أتوقع ، بس ما أعرف بالضبط كيف يقل المعدل يبي لها طريقة حساب معينة
بس هو يعتمد على أيش المادة اللي جبتي فيها

فمثلًا لو جبتي بي في البايولوجي - البايولوجي على دفعتها عليه 5 ساعات- فالنقص بيكون أكثر في المعدل من لو جبتي بي في الفزكس -على سنتنا عليه 2أو3-

ففي لها طريقة حساب معينة ، بس بعد مااتوقع تنزل عن الـ 4.5 لو بس هذي الناقصة

و سؤال ثاني ، لو كانت درجتي اعلى من الآڤرِج ، يغير شي ؟ لو خلاص درجتي هي درجتي ؟

January 16, 2014

أعلى من الآفرج في أيش ؟
غالبًا درجتك هي درجتك إلا لو سووا كيرف أب أو شي مثل هالسوالف

يعني ممكن مثلًا ، يعطونكم بونس سؤال مااحد حله أو لو الدرجات كلش مو كويسة
يشوفون أيش أعلى درجة ويخلونها الفل مارك
مثلًا أعلى درجة 19 من 20
تصير الفل مارك 19 ، فترتفع درجاتكم

ما أدري أحس ما أستوعبت في أيش ممكن تتغير آسفه ، لو مو هذا قصدك وضحي لي أكثر :*

مساء الخِير بيان ♡ ، انا بسأل عن المعدل في النهاية كيف ينحسب ؟ بعني لو كل المواد A+ و مادة مثلا B هل ما اقدر ادخل في منافسة الطب ؟ ولا عادي ؟ ما ادري عجزت افهم طريقتهم

January 16, 2014

مساء الخيرات والأنوار
شوفي حبابة ، شروط الطب
Bفي المواد العلمية
وماترسبين في ولا مادة ، تمام ؟

فالحين لو جبتي في كل المواد العلمية بي أو فوق ، تنافسين .
لو جبتي في كل شي أيه+ ، ومادة وحدة مثلًا في البايولوجي سي . ماتنافسين لأنك ما استوفيتي الشروط
لو في كل المواد العلمية أيه بلس + وجبتي أف في مادة مثلًا الإتصال . ماتنافسين

أهم شي كل المواد العلمية بي وفوق + ماترسبين في مادة وتدخلين المنافسة

طيب ابي اقولك انا ناوية على طب بس احس كيف الدراسة صعب مادري بقدر استحمل واكمل واقدر استوعب او ﻻ مع ان نسبتي حلوة قدرات ومدرسة بس مشكلتي بالحفظ ان مو متعودة احفظ كثير ادري انك اسنان بس قولي عن الي تعرفينه عن دراسة الطب بشكل عام .

January 16, 2014

شوفي حبابة
إذا كانت عندك رغبة فعلًا فخطأ تحطين في بالك ما أقدر وما أستحمل من الآن ! اذا من الحين حطيتي هالفكرة كيف بعدين :)

معروف عن الطب أنه اللي يدخله لازم تكون عنده رغبة حقيقية وعزيمة قوية .
هذي دراسة 6 سنوات ، عمر حرام يضيع في شي يمكن انتِ ما تبينه ، فأول شي تأكدي إذا انتِ تبينه فعلًا ولا لا !
وبالنسبة للطب ، فيه حفظ أكيد وفيه فهم بعد . والحفظ هذا شي تقدرين تطورينه مع الزمن وتكتسبينه . لو فعلًا تبين طب ، لا تخلين شي بسيط مثل هذا يمنعك

الطب -بحسب تجربة خواتي- ممتع جدًا ، متعب جدًا .
لو أنتِ حابته فعلًا بتستمتعين ، ولازم تكون فيه صعوبات ، ودراسته الطويلة وتعمقه في كم معلومات كبير هذي صعوبة

مافي تخصص صعب ، مع رغبة
ومافي شي " مااقدر " مع محاولة جادة :)

أي شي أكثر مفصل تبين تعرفينه سأليني بشكل دقيق عنه لأن الحين ماادري بالضبط أيش أقول
*حاولي ماتحبطين نفسك بـ مااقدر أستحمل وأكمل من الآن ؛) فيكِ انطوى العالم الأكبر

حابة اسألك كيف كان استعدادك للقدرات انا ذاكرات قياس و قدرات للبابطين و ابدا ما فادتني بالعكس ضيعت وقتي فأيش تنصحيني فيه اذاكر من التجميعات ؟و اذا فيه كتب با ليت تقولي ايش هيا و شكرا سلفا

January 16, 2014

http://bayanhali.wordpress.com/2012/08/11/qyas1
هنا رابط لتدوينة القدرات ..
لكن للإختصار ..
أنا دخلت مركزين تدريب "دورتين" للقدرات وحدة في ثاني ووحدة في ثالث
الأمثل- الرواد في القطيف وذاكرتهم من ملازمهم فقط وفقط
التحصيلي ذاكرته من التجميعات ومن كتب الدورة -الرواد-
،
كثييير ناس استفادوا من موقع يزيد + التجميعات لكني ماكنت أعرف أدرسهم مااعرف ليش :\

مين اختباراته ومواده أطول الطب ولا طب الأسنان

January 16, 2014

أممم صعب السؤال لأن ماعندي خلفية كبيرة عن السنوات الجاية أو الطب
بس اللي أعرفه وحسب دراستي هالسنة :
أول شي مدة الدراسة نفسها ، بالنسبة للـدوام احنا في الاسنان نبدأ بدوام قصير وكل سنة يطول
الطب بالعكس يبدأون طوييل ، كل سنة يقصر
بالنسبة للإختبارات ، نظامنا غير نظامهم
مواد الأسنان أغلب الدرجة على أعمال طول السنة ، واجبات أسبوعية ، إختبارات قصيرة في بعض المواد اسبوعيًا و إختبارين منتصف والنهائي كل سمستر.
الطب ما يختبرون طول السنة كثرنا ، عندهم اختبار منتصف واحد والنهائي آخر السنة وماعندهم واجبات زينا

مين أكثر مااقدر أحدد فعلًا

حلو تخصص طب الاسنان ؟

January 15, 2014

تسألين شخص دخل طب الأسنان عن رغبة ؛) أكيد بقول حلو ؛)

التخصص حلو عمومًا ، فيه شغل كثير جدًا يدوي ، فيه إحتكاك طويل بالمرضى ، مو أسهل من الطب ، التخصصات حقته مرة واسعة وحميلة ؛) ونفس الطب مهم الواحد يدرسه وهو مقتنع فيه
مع إننا ماتعمقنا في الدراسة البحتة للأسنان لكن مواد الأسنان اللي أخذناها فعلًا ممتعة -بالنسبة لي على الأقل-

يختي أحبك ❤❤ يسعدلي قلبك

January 14, 2014

aww <3
شكرًا للطافتك ، الله يسعدك أضعاف :')

بيان تنصحيني اذاكر بالإجازة مع اني ما ودي و ابغى تفرغ الطاقة اللي فيني بس شسوي أخاف اندم بعدين انتي شخصيا ذاكرتي

January 14, 2014

اهلًا
بس عفوًا مافهمت خلصنا السمستر أيش بتذاكرين أصلًا ؟؟

Liked by: Erum Ali

بيان بالنسبة للآيلتس ايش اصعب قسم كان و هل الريدينق صعب زي ما يقولوا وإذا انا مستواي أدفانس ممكن أجيب فوق 5 بسهولة و شكرًا

January 14, 2014

بالنسبة لي كان الإستماع
لأن أنا عمومًا مو شاطرة بهالقسم ، بس اذا تعلمتي تاخذين ملاحظات وانتِ تسمعين أمورك تمام ؛)
الريدنق يختلف ، وحسب ما أذكر كأن كانوا ٣ قطع ، المهم فيه بالنسبة لي كان فيه وحدة منهم صعبة ومافهمتها كويس بس جاوبت قدر مااقدر وجبت فيه كويس.
بالنسبة له بشكل عام ، احس انه تحضيري طور مستواي ودربني كويس ، وكانت سهلة ، انه الاجزاء اللي انتِ شاطرة فيها بترفع مستواك ؛)
*الكتابة عن رسم بياني ابحثي عنها وتدربي على الأسلوب
والمحادثات فيه مواضيع شائعة يتكلمون عنها اطلعي عليها وعلى أسلوبها بشكل عام ؛)
موفقة

أبغا صفحتك ب تويتر . ؟

December 22, 2013

@bayanhali

Where do you think Santa Claus is from?

December 22, 2013

Moon

انصحيني بحسابات اتابعها على تويتر ناس بنفس لطافتك

December 22, 2013

شكرًا جدًا
امممم صعب السؤال
مافهمت نوع اللي تبين تتابعينهم :$

بيان ابيش في شيء... كيف اترك فكرة تأثر ع حياتي سلبيا!

December 22, 2013

فكري فيها هل هي قابلة للتغيير ؟ أو لا
هل أنتِ سبب فيها أو مالك دخل ؟
إذا كان لك دور في تحسينها ، أشتغلي عليها ، لو لا تتعبين نفسك ليش ؟
احسن حل :
١- التكرار الببغائي للعقل الباطن بنقيض الفكرة
٢- القرآن الكريم والإرتباط الروحي بالله
٣- البدأ بفعل مايناقض الفكرة .
*لو تكونين أكثر تحديد لنوع الفكرة يمكن أفيدك أكثر

كيف طريقتك بالدراسه أيام المراجعه ؟

December 22, 2013

كيف يعني أيام المراجعة ؟
في ثنوي ماكنت أذاكر أبدًا أبدًا وقت المراجعة
أيام الجامعة في التحضيري سويت لي جدول أنا وصديقاتي نمشي عليه بحيث المواد العلمية على أقل تقدير نكون مخلصين ٧٥٪ منها قبل ايام الإختبار
في سنة ثانية ، ماكان فيه ايام مراجعة ، ٤ ايام بس فاضيين فيها بدون كويزز واسايمنتز قبل الفاينل
بس بعض المواد اللي كانوا الدكاترة يقولون "تتوريال" -مراجعة
كنت اذاكرهم ، ولو ماقدرت على الأقل أقرأهم .

كيف تتصرفين مع شخص ضايقك أو جرحك بشي ؟

December 21, 2013

غالبًا أسكت كفعل أول
الفعل الثاني ، حسب الشخص بين خواتي وأمي لازم اقول لهم بعد فترة ترى ازعجتني في كذا وكذا ، متعودة كذا
شخص أمون عليه اوضح الفكرة بس مو بشكل مباشر
شخص ما أمون عليه ، أحاول أنسى ، الحياة ماتوقف على شخص ولا موقف

بيان علي

Nothing here yet